聯繫匯率可唔可以散？點嘅情況可以散？

以下純學術討論⋯⋯

金管局總栽今日寫咗BLOG講聯繫匯率，題目係《以事實為本看金融穩定》https://www.hkma.gov.hk/chi/news-and-media/insight/2020/06/20200602/

全篇文1666個字，作為讀者，自己最想知聯繫匯率會唔會散。但睇來睇去，淨係睇到呢幾句最有關係：

總栽話「有一些輿論指美國的《香港政策法》有提及港元與美元的兌換，擔心聯匯制度會否被「單方面取消」，甚至有人言之鑿鑿，指可以禁止香港使用美元結算系統」

然後講咗好多以前講咗幾次嘅數據呀、歷史呀⋯⋯

「事實上，香港在1983年10月已推行聯匯制度，時間上遠早於美國國會在1992年通過賦予香港特殊待遇的《香港政策法》，所以聯匯制度並不是《香港政策法》給予的「特殊待遇」，而是香港基於自身對金融和貨幣穩定所需而設立。在過去36年來，聯匯制度曾經歷多次市場震盪的考驗，但一直運作順利，是香港貨幣金融體系的基石，不會因為外國對香港的政策而改變。」

之後話：「因此，發生這種極端情況的可能性有多大，大家應該心中有數」。

心中有數？市民就係冇。咁即係散定唔散？可唔可以散？點嘅情況可以散？金管局就係做呢樣嘢，可唔可以簡單啲話俾市民聽呢？你唔Yes又唔No，金融市場就最大忌。風險管理唔係淨係講可能性有幾大，而係要講埋一啲萬萬萬萬一出現係會死人嘅事，「可能性非常低」逆向思維即係「可以發生」。

可能總栽AO出身，寫嘢有一手。講啲嘢都係準確嘅資料，但邏輯唔係好清楚，而且好似冇簡簡單單嘅結論。大家只需要六個字，最多加埋「一定」，就係「聯繫匯率一定唔變」，唔洗另外嘅1000幾個字。

聯繫匯率歷史同《香港政策法》其實唔係重點，因為牽涉人哋嘅貨幣美元先至係關鍵，至少係呢度冇回答嘅問題。當然，如果美國唔俾香港嘅銀行用美元結算，聯繫匯率仲WORK唔WORK？佢又冇答。大家做過電匯就知道，中間係有對家嘅收款銀行，有時仲有中轉行，加埋自己間付款銀行，分分鐘有3間銀行參與一個簡單嘅T／T。外匯可以閂埋門自己做似乎唔係真實情況。呢一樣唔洗金融專才都可以明白。

作為香港人，當然唔想見到香港亂，但分析始終要客觀。

老實講，佢已經好專業（香港人嘅傳統同優勢）。點解？因為由頭到尾佢冇話一定冇事。有乜制度係會永遠？1971年之前啲國家印貨幣要有黃金做儲備，叫金本位，1971俾美國一國整散咗，美元獨大。。歐羅前身有歐洲匯率機制，1979年開始之後啲歐洲貨幣一個一個消失咗，後來英國話唔玩，所以仲有英磅，但德國馬克、法國法朗、意大利里拉就冇咗。香港後生一輩好有智慧，google吓就知。

所以，今次全世界係咪會再出現一次取消金本位級數嘅金融事件呢？今次疫情咁勁，啲政府發債發到咁，可以點收科？其實，歷史發生過嘅嘢係可以再發生，而且經常係咁。

建議大家多啲睇全世界嘅歷史，你會發覺依家嘅事似曾相識。結果「聯繫匯率脫鈎」發生就一定係非同小可，似乎呢樣嘢總栽冇話冇可能。不過，單呢樣嘢唔會因此世界末日。