MPF你要知：人係唔理性嘅

朋友問：宜家世界啲中央銀行又再放水，救唔救到經濟？

其實正如諾貝爾經濟學獎得主‎Daniel Kahneman的書《Thinking , Fast and Slow》用科學化嘅實驗證明：人本身係唔理性嘅。

2009年世界金融危機後，全球中央銀行大印銀紙，之後全球嘅樓、股、古董、名畫、藥材價格通通升咗幾倍，只因為有錢冇嘢買。至於救唔救到經濟？你睇下全球嘅負債升咗幾多就應該明白。如果經濟係由生產上升帶動消費，負債唔應該同啲物價一樣以幾何級數上升。但你睇下今日包括中國、美國、歐洲、日本，佢哋嘅政府已經唔再敢好似以前咁又減息又揼水都唔驚。家陣美國失業率已經17%，中國第一季GDP已經冇咗一大截，而且平均人人嘅負債已經高過2009年嘅水平幾倍。咁係咪即係過去十幾年嘅「繁榮」其實係碌卡碌返嚟嘅？咁係咪可以持續？

可以由冇變到有嘅我只知道一位，呢位就係創造宇宙嘅上帝。我哋生產每樣嘢都係用有限嘅天然資料做材料，金融市場就更加冇創造任何嘢出嚟。

人就係咁樂觀，成日認為明天會更好，所以覺得一定有方法。人想救經濟其實係良好意願，不過如果認為不停借錢、消費係可以救經濟就似乎比較天真，而且唔負責任，更加不可持續。你信嘅話就似乎係迷信多過分析喇。

不過，人經常用唔同嘅方法求經濟，真係好似上帝叫自己嘅獨生兒子救我哋嘅心態，令我從另一個角度睇到上帝俾咗佢嘅形象俾人。當中唔同嘅係，上帝係上帝，但人嘅罪性缺陷令我哋無論幾好意願，做嘅嘢始終唔會work，歷史只係不停重複。過去10幾年用幾千年人類歷史未有過嘅低利率去迫人投資搞到全世界物價飛咗去太空，將當時嘅問題拖住先，但一個疫症就將所有嘅後遺症揭晒出嚟。家陣又用印銀紙去處理呢啲後遺症，你話會點？我唔識估，但好難可以覺得件事係合理、方法係對症下藥囉。如果咁都得，就即係話做任何事都唔會有後果。

人係要面對自己做嘅事嘅後果，咁先係大自然嘅運作法則。上帝可以救我哋，但要我哋先面對自己嘅罪，即係承認自己係有缺陷，而且唔可以自救，要靠耶穌嘅十字架救恩去贖咗我哋嘅罪，然後跟隨佢嘅教導去生活。呢個救市方案就係咁，歷世歷代係無數人嘅生命中證明係work。如果大家覺得一直唔work嘅救市方法救唔到經濟（除非唔係），你係咪應該問問自己點解唔信上帝有成功記錄嘅個plan？

如果可以，麻煩幫手share出去。感謝。